Roothuus-Schnäpfe 2026, e brilliante Jubiläums-Johrgang

1. Schnäpfe-Gschichtli

10 Johr Roothuus-Schnäpfe 2016 – 2026

(Melodie dr Eskimo - Mani Matter)

Kennet ihr die Gschichtli no

Wo dir vo eus Schnäpfe händ verno

Sit 10 Johr düend mir euch brichte

Und für euch die Versli dichte

2016

Um s Wäberhölzli e riese Sach

An dr Gmeindsversammlig gits e Krach

Buebetrickli - Emotione

Dr Kampf ume Wald de duet sich lohne

2017

Im Stadtpark muess öbbis neus jetzt ane

E Chugelibahn mit ville Bahne

Nid nur d Chind händ Freud am tolle

Au dr Gmeindrot lot Chugeli roll

2018

E krasse Sturm fägt d Märtgass dure

Dr Wiehnachtsbaum de gheit uf d Schnure

denn het me chli witer denkt

und d Tanne glatt im Loch versenkt …

2019

Dr Steg chunnt nid s würd sich nid lohne

Dä hätt koschtet z vill Millione

Uf dr Schwobe-Rundi s isch zum schisse

Muesch länger latsche - durebisse

2020

5G-Antenne wo duet strahle

die het miesse dringend ane

si händ se Richtig Möhli gstellt

und d Lüt dört geistig chli erhellt

2021-2022

Corona isch gsi e schlimmi Sach

Mir si alli gläge zimlig flach

Aber s Homeoffice das het eus passt

Händ kei TV-Serie me verpasst

2023

Im Summer isch e Affehitz

im Roothuus schwitze mir e biz

Im Winter ischs denn affig chalt

Ohni Heizig … mir miend spare halt ..

2024

E Puff im Kloos s isch allerhand

raubt de Manne dr Verstand

dr Loosli glasse, isch nid pressiert

villicht au selber interessiert …

2025

Im Engerfeld brennts fürio

Dr Läbi isch grad sofort cho

mit rotem Chopf so wie sich’s ghört

het er alli zämegschisse dört …

2. Dr Agriff

Mir schaffe brav im Roothuus, so wie jede Tag

Plötzlich isch e riese Krach, eus trifft fast dr Schlag

Us dr Luft e Agriff, das chönnt nur d Schwobe si

Mir gsehnd eus scho im Himmel, jetzt isch alls verbi

Ei Heli nach em andere fliegt uf s Roothuus los

d Panik isch verbreitet und d Angst isch riesegross

Au dr Franco Mazzi, het sich total verschreckt

und het sich grad subito, unterm Pult versteckt

S Bauamt het zum Glück entwarnt es gieng um d Rhy-Terrasse

Wo me halt mit schwere Stei neu muess ganz yfasse

Und d Schwobe blibe eusi Fründe, do scheide sich zwar Geister

Hauptsach isch si werde im Summer uf gar keifall Weltmeister.

3. Schönheit

Letscht Summer si mir Schnäpfe, öfter z Basel gsi

und händ eus chli lo triebe, in dr s Szene dört am Rhy

Händ Cüpli trunke, gschnäderet und das bi bester Luune

händ d Lüt begafft, chli gläschtert und mängisch miesse stuune.

Schönheit isch jo relativ und echt e Frog vom Gschmack

Vo Hippie-Stile zu Chicki Micki oder ganz in Lack

Tattoos am ganze Körper, Piercings au im Nabel

oder dört wo anderi Lippe händ, e dicke Enteschnabel.

Als Vorbild händ die sicher, eus Roothuus-Schnäpfe gno,

denn cha me jo de Schnabel, no e biz verstoh

Doch wenn de weisch wie die das mache fohts di afo lüpfe

die düend jo s halbe Füdle dört in ihri Lippe sprütze!

4. Dr Depp

(Melodie dr Alpeflug - Mani Matter)

Si zwei Bundesröt im Düsejet in d Staate go verhandle

D Keller Sutter het sich useputzt zum mit em Trump azbandle

und dr Parmelin - hejo - wie chas au anderst si

Het in sim Gepäck e grossi Chiste wisse Chassela Wy

Doch dr Trump isch arrogant - si händ bi ihm grad gar kei Dusel

Dr Wy vom Waadtland spöitzt er us - das isch e suure wisse Fusel

s Karin cha bi ihm nid lande – so isch de Grüsel halt

Sie isch für si Gschmack chli z runzlig und rund vierzig Jöhrli z alt.

Jä gopfridstutz das cha nid si, was sölle mir nur mache

Die höche Zöll legge d Wirtschaft flach und alls wird zämekrache

E Katastrophe bahnt sich a, mir bruche d Lösig jetzt

do händ sich paar Wirtschaftsbosse endlich in Bewegig gsetzt

Die Milliardäre unter sich, die verstönde sich persee

Sie tikke glich, düend chli schmiere, dr Trump het sini Vorteil gseh

D Zöll sind gsenkt doch dr Priis drfür isch nonig richtig gwüss

Je nach Lust und Lune vo dem Depp wie s en juckt an sine Nüss

(Melodie: Dr Hans im Schnäggeloch)

Dr Depp im wisse Huus het alles was er will

Was er nid het, das nimmt er sich

Und was er het, das git er nit

Dr Depp im wisse Huus macht alles was er will

5. S Gschenk

Grosszügig zeigt sich d Rhysaline, wänd d Region gross ehre

drum düend si eus e Kunstwerk schenke wo me cha begehre

e Denkmol ans Urmeer söll das si und ufeme Kreisel stoh

e grosse Ufschrei in de Medie, mir händs zur Kenntnis gno.

Mir finde das Kunstwerk nid so schlimm, gseht us wie Panzersperri

au dr Standort isch doch super gwählt, wo grad vor Möhli weri

Ergänze chönnt me das Gebilde mit zwei Schranke, toll!

und d Möhlemer bläche bim passiere e grosse Batze Zoll.

6. Claudio mitten drin

Wenn im Städtli öbbis lauft denn chasch echt druf go

Dr Claudio Meier isch drbi und het alls verno

Usem Lade mit sim ganze Kram het er e gueti Sicht

und erstattet laufend allne Medie live si Bricht.

Im Mona Lisa Bombe Alarm - Tele M1 isch cho

Dr ganzi Hipe wegere Taschelampe - het me denn verno

Mitte drin dr Claudio - wo grad live cha brichte

Und no s eint und s ander, drzue het chönne dichte.

Au dr Raub bim Juwelier het er kommentiert

Dört het e Passant Courage zeigt und däm Räuber eis poliert

Wer nit erschiint im Bild jo klar, dr Laferi mit Huet

wo mediegeil grad d Bea Bieber übertrumpfe duet.

Nachsatz:

Und chürzlich het er sich au nit geniert und im SRF live über sis Sexläbe referiert …

De Hengst isch jo chuum me z stoppe … er würd am liebschte die ganzi Wuche durepoppe …

7. Wahle

Vor de letschte Gmeindrotswahle, simr agspannt gsi

Wer chunnt neu zu eus ins Roothuus, wer isch no drbi

E Frau als Chefin an dr Front das finde mir famos

Z befürchte isch dass mir jetzt sind, euse Job dört los

E Frau mit Strahlchraft brucht eus nid als Dekor näbedra

Si het jo jetzt zwei schöni jungi Kollege wunderbar

Chunnt das guet mit dene zwei, das hämr recherchiert

Und verzelle euch s Ergäbnis völlig ungeniert

Dr Benji isch e schlaue Fuchs, het dr Partei dr Rugge kehrt

het dr FDP e Sitz abgluchst, was ihn jo nid grad ehrt

Suscht isch er e glatte Siech und mir wüsse alli doch

als Aprés-Ski-Lehrer exklusiv chan er suffe wie e Loch.

Dr Lässer wohnt grad näbedra und leerts au nid in d Schueh

Aber er weiss zimlig gnau, wenns für ihn isch gnue

Wahrschinlich wird’s mit ihm no glatt, das glaube mir jo gar

mit ihm im Gmeindrot hämr nämlig euse Obernarr!